Har du hund?
Døra vert ståande
På gløtt etter deg.
Brått er eg ei gamal dame som
Klagar over trekken,
Og eg vert sittande
For å bli forkjøla.
Dette er ikkje bra for helsa, seier dei
Eg reiser meg knirkande og motvillig i alle ledd
På dørstokken
Tek eg ein svært så liten kikk ut:
Du er framleis på veg
Bort frå meg
Dei stive fingrane mine
Grip dørklinka
Du kjem til å høyra smellet, tenkjer eg
Du kjem til å snu deg, vil eg tru
Du kjem til å koma attende, håper eg
