Visning

Eg opnar dørene inn til
Dei stille romma

Men du kom visst for å
Studera spegelen i entreen

Har du hund?

Døra vert ståande
På gløtt etter deg.

Brått er eg ei gamal dame som
Klagar over trekken,

Og eg vert sittande
For å bli forkjøla.

Dette er ikkje bra for helsa, seier dei

Eg reiser meg knirkande og motvillig i alle ledd

På dørstokken
Tek eg ein svært så liten kikk ut:

Du er framleis på veg
Bort frå meg

Dei stive fingrane mine
Grip dørklinka

Du kjem til å høyra smellet, tenkjer eg
Du kjem til å snu deg, vil eg tru
Du kjem til å koma attende, håper eg

Med skum om munnen og
Appetitt på livssyklusar

Møter bølgjene
Smuldrande fast element

Dei svelgjer sandkorna

Og glefsar begjærleg etter
Tærne mine

Her kjem flaumen av
Tome ord
Strøymande or munnane

Dei slamtunge elvane møtast
Midt mellom menneska
Vatnet eksploderer
Og ingenting blir alt

På denne sandgrunn
Byggjer me hus

---

Og me tvingar sjela til tystnad

Stilla hennar er bekken
Som uhøyrleg utholar bakken

I håp om å løysa opp mørk materie,
Hellar du boblar i blodet.

Berre eg ser kor lite det nyttar,

Eg krøllar tunga og kvessar blyanten
For eg har det du manglar, ta imot det, bruk det:

Her! er språket for det ordlause.

O! Du søte eksamenstid

Eg helsar deg med kaffikopp i handa og
Brillene fastgrodd på naseryggen

Du trakterer meg med overspente fingre
Eg er ditt ustemte flygel!

Dei legg seg i venstrefila, suser forbi, men eg

Skal ikkje koma tidsnok til anna enn morgondagen, og til den har eg aldri kome for seint

Det neste eg skal rekka er døden,
Som den nye dagen kjem han heller for tidleg enn i siste lita

Eg held meg i høgrefila, tek så av på ein sideveg, finn meg ein rasteplass

Kollektiv pause

På parallelle
Skjener som strekk seg
Herifrå og heilt heim

Tipp-topp-tom timeplan

K

(eg har sett gjennom gamle tekstar eg skreiv på folkehøgskulen. her er to forsøk på scenisk tekst.)

Konflikt K
Karakterar: Gut og jente

G: Kaffi?

J: Kvifor?

G: Koseleg?

J: Kva?

G: Kjærleik?

J: Korleis?

G: Kysse?

J: Kven?

G: Kjerring!

J: Kylling!



Dialog K
Same karakterar som i Konflikt K

G: Kaffi?

J: Klart

G: Koseleg?

J: Kjempe

G: Kjærleik?

J: Kanskje

G: Korleis?

J: Kysse

G: Kom!